سری نگر//چیف سیکرٹری اَتل ڈولو نے آج مرکزی سیکرٹری وزارت مائیکرو،سمال اینڈ میڈیم اَنٹرپرائزز( ایم ایس ایم اِی) ایس سی ایل داس کے ساتھ ایک تفصیلی ملاقات کی جس میں جموں و کشمیر میں موجودہ صنعتی منظرنامے پر تبادلہ خیال کیا گیا اور ایم ایس ایم اِی سیکٹر کے فروغ اور دیرپائی کے لئے طویل المدتی حکمتِ عملیوں کو تلاش کیا گیا۔ میٹنگ میں کمشنر سیکرٹری صنعت و حرفت وِکرم جیت سنگھ اور سیکرٹری محنت و روزگار کمار راجیورنجن نے بھی شرکت کی۔دورانِ گفتگو چیف سیکرٹری نے موجودہ اور نئے قائم شدہ صنعتی یونٹوں کی طویل مدتی دیرپائی کو یقینی بنانے کے لئے ایک مضبوط اور جامع روڈ میپ کی ضرورت پر زور دیا۔اُنہوں نے اس بات پر زور دیا کہ جموں و کشمیر کا صنعتی منظرنامہ تاریخی طور پر اس کے منفرد جغرافیائی و سیاسی تناظر سے متاثر رہا ہے کیوںکہ یہ ملک کا ایک سرحدی علاقہ ہے جس کی وجہ سے اسے مختلف لاجسٹک اور کنکٹویٹی چیلنجوں کا سامنا ہے۔
چیف سیکرٹری نے ایم ایس ایم اِی سیکٹرکی بے پناہ صلاحیت کو روزگار اور معاشی بااِختیار بنانے کی ایک اہم ذریعے کے طور پر اُجاگر کیا اور وزارت سے تکنیکی اور مالی تعاون فراہم کرنے کی اپیل کی تاکہ جموں و کشمیر میں ایک فعال کاروباری ماحول کو فروغ دیا جا سکے۔اُنہوں نے کہا کہ اَب جموں و کشمیر صنعتی ترقی میں تاریخی خلاؤں کو پُرکرنے کی پوزیشن میں ہے اور خطے کے نوجوانوں کو خود کفیل روزگار فراہم کرنے والے بننے کے لئے مواقع اور وسائل فراہم کئے جانے چاہئیں۔ اَتل ڈولونے وزارت سے اپیل کی کہ وہ نوجوانوں میں کاروبار سے متعلق رُجحان پیدا کرنے کے لئے ہدفی پروگرامز شروع کرے کیوں کہ ماضی کے حالات کی وجہ سے یہ نوجوان ایسے مواقع سے محروم رہے ہیں۔ اُنہوں نے مقامی اَفرادی قوت کو جدید ٹیکنالوجی پر مبنی صنعتوں سے ہم آہنگ مہارتیں سکھانے کے لئے تعاون میں اضافے کی بھی اپیل کی تاکہ وہ بہتر روزگار حاصل کر سکیں۔اُنہوں نے کاروباری مواقع کی بہتر فراہمی، مالی معاونت اور رہنمائی کے لئے جامع پلیٹ فارموں کو قائم کرنے کی ضرورت پر بھی زور دیا۔ اُنہوں نے دیہی اور شہری علاقوں میں ایم ایس ایم اِی سیکٹر کی ترقی کے لئے ڈیجیٹل انفراسٹرکچر اور سپورٹ سسٹم کو وسعت دینے کی تجاویز بھی دیں۔اِس کے علاوہ چیف سیکرٹری نے خطے میں متاثرہ اور بند صنعتی یونٹوں کی بحالی کے لئے مؤثر حکمت عملیوں کی تیاری میں وزارت سے مدد طلب کی۔ اُنہوں نے کہا کہ ان یونٹوں کی بحالی کے لئے مخصوص اَقدامات ضروری ہیں کیوں کہ یہ مقامی معیشت اور روزگار کا بنیادی حصہ ہیں۔مرکزی سیکرٹری نے جموں و کشمیر میں صنعتی ترقی پر یو ٹی اِنتظامیہ کی توجہ کو سراہا اور یقین دِلایا کہ وزارتِ ایم ایس ایم اِی سیکٹر کو مضبوط بنانے میں مکمل تعاون فراہم کرے گی۔ اُنہوں نے کہا کہ وزارت یو ٹی اِنتظامیہ کے ساتھ مل کر ضرورت پر مبنی سکیمیں، سکل ڈیولپمنٹ ماڈیولز اور بنیادی ڈھانچے کی معاونت فراہم کرے گی تاکہ خطے کی صنعتی صلاحیتوں کو بروئے کار لایا جاسکے۔ میٹنگ کا اِختتام وزارت ایم ایس ایم اِی اور یو ٹی حکومت کے درمیان مستقل اور اِدارہ جاتی تعاون کے عزم کے ساتھ ہوا تاکہ جموں و کشمیر میں طویل مدتی، جامع ترقی اور معاشی استحکام کو یقینی بنایا جا سکے۔
58
