وزیر اعلیٰ نے ایس کے آئی سی سی میں نیشنل کانفرنس برائے مریضوں کی حفاظت کا افتتاح کیا

جموں و کشمیر میں صحت کی دیکھ بھال کو مضبوط کرنے کیلئے مریضوں کی حفاظت اور دیکھ بھال کو مربوط کرنے پر زور دیا
سرینگر//وزیر اعلیٰ مسٹر عمر عبداللہ نے شیر کشمیر انٹر نیشنل کنونشن سینٹر ( ایس کے آئی سی سی ) میں شیر کشمیر انسٹی ٹیوٹ آف میڈیکل سائنسز ( ایس کے آئی ایم ایس ) صورہ کے زیر اہتمام دو روزہ نیشنل کانفرنس برائے مریضوں کی حفاظت ( این سی پی ایس ۔ 2025 ) کا افتتاح کیا ۔ کانفرنس کا موضوع ’’ ہر غلطی ایک سبق ، ہر سبق ایک محفوظ دیکھ بھال ‘‘ ہے ۔ اپنے افتتاحی خطاب میں وزیر اعلیٰ نے امید ظاہر کی کہ ایسی کانفرنسیں حکومت کیلئے واضح سفارشات تیار کریں گی جنہیں جموں و کشمیر کے صحت کے اداروں میں نافذ کیا جا سکے گا ، اس طرح بہتر صحت کی دیکھ بھال اور مریضوں کی حفاظت کے معیارات کو یقینی بنایا جا سکے گا ۔ مسٹر عمر عبداللہ نے کہا ’’ اس کانفرنس کے ذریعے میں امید کرتا ہوں کہ قابل عمل نکات سامنے آئیں گے جنہیں حکومت بڑے اور چھوٹے ہسپتالوں میں اپنا سکتی ہے ، اس بات کو یقینی بناتے ہوئے کہ مریضوںکی حفاظت پر اتنی ہی توجہ دی جائے جتنی مریضوں کی دیکھ بھال پر دی جاتی ہے ۔ ‘‘ انہوں نے زور دیا کہ اگرچہ مریضوں کی دیکھ بھال اور مریضوں کی حفاظت آپس میں گہرے طور پر جُڑے ہوئے ہیں ، لیکن یہ صحت کی دیکھ بھال کے الگ الگ پہلو ہیں ۔ انہوں نے مزید کہا ’’ مریضوں کی دیکھ بھال اس باے میں ہے کہ ہم بیماری کا علاج کیسے کرتے ہیں ۔ تشخیص ، علاج اور مریض کیلئے ہمدردی ۔ دوسری طرف مریضوں کی حفاظت کا مطلب ہے کہ ہر احتیاط برتنا تا کہ ایسی غلطیوں سے بچا جا سکے جو زندگی کو خطرے میں ڈال سکتی ہیں ۔ کوئی علاج اس وقت تک اچھا نہیں سمجھا جا سکتا جب تک دونوں کو یقینی نہ بنایا جائے ۔ ‘‘ کانفرنس کے مقصد کو اجاگر کرتے ہوئے وزیر اعلیٰ نے کہا کہ مباحثے صرف علمی بحث تک محدود نہیں رہنے چاہئیں بلکہ ان کا ترجمہ عملی اقدامات میں ہونا چاہئیے جو جموں و کشمیر کے ہسپتالوں میں نافذ کئے جا سکیں ۔ انہوں نے کہا ’’ ایسی کانفرنسوں کا سب سے بڑا فائدہ یہ ہے کہ ہم دوسروں کے بہترین طریقوں سے سیکھ سکتے ہیں اور انہیں اپنی منفرد حالات کے مطابق اپنا سکتے ہیں ۔ ‘‘ وزیر اعلیٰ نے اس موقع پر این سی پی ایس 2025 کا سووینئر اور ایس کے آئی ایم ایس کا سالانہ جائیزہ رپورٹ2024-25 جاری کیا ۔ افتتاحی اجلاس سے خطاب کرتے ہوئے وزیر صحت و میڈیکل ایجوکیشن محترمہ سکینہ ایتو نے ایس کے آئی ایم ایس کو شیر کشمیر شیخ محمد عبداللہ کے وژن کے مطابق ایک اعلیٰ طبی ادارے کے طور پر سراہا ۔ انہوں نے کہا ’’ ہمیں شیر کشمیر اور ان کی ٹیم کے شکر گذار رہنا چاہئیے جنہوں نے ایس کے آئی ایم ایس قائم کیا ۔ وزیر اعلیٰ عمر عبداللہ کی قیادت میں حکومت ہمارے صحت کے اداروں کو مضبوط کرنے کیلئے جدید آلات اور سہولیات فراہم کرنے کیلئے پرعزم ہے تا کہ لوگوں کو علاج کیلئے جموں و کشمیر سے باہر نہ جانا پڑے ۔ ‘‘ وزیر اعلیٰ کے مشیر ناصر اسلم وانی نے اپنے خطاب میں کہا کہ ایس کے آئی ایم ایس کی ساکھ اس کی مریضوں کی دیکھ بھال اور حفاظت کیلئے مضبوط عزم میں مضمر ہے ، جس نے اسے جموں و کشمیر میں ایک قابلِ اعتماد ادارہ بنایا ہے ۔ انہوں نے ایس کے آئی ایم ایس کے اس کردار کی تعریف کی کہ اس نے ہزاروں ماہر ڈاکٹروں کو تیار کیا جو جموں و کشمیر ، ملک کے دیگر حصوں اور بیرون ملک معیاری صحت کی دیکھ بھال میں اپنا حصہ ڈال رہے ہیں ۔ افتتاحی سیشن سے سیکرٹری ہیلتھ اینڈ میڈیکل ایجوکیشن ، ڈائریکٹر سکمز ، ہیڈ آف ہسپتال ایڈمنسٹریشن اور سکمز کے بانی ڈائریکٹر ڈاکٹر اے کے ناگپال نے بھی خطاب کیا ۔ کانفرنس میں فیکلٹی ممبران ، سینئر ڈاکٹرز ، محققین ، سکالرز اور ملک بھر سے آئے ہوئے مندوبین شرکت کر رہے ہیں ۔ حاضرین میں کئی ایم ایل ایز ، سکمز کے سابق ڈائریکٹرز ، ڈائریکٹر ایس کے آئی سی سی ، انتظامی افسران اور سکمز کے سینئر فیکلٹی ممبران شامل تھے ۔